Gal 3 | MHL | STEP | Ni Galesia faa, kema marew akena. Yo iiriw baliwep akena nia maakemkun Yeesus Krais nomokow moke-pa umok nain niena mokok onaiya urufowa saarik baliwep amisareman. Nain maa-ko ikiwosa nia momoreya o opora piipuowa naep oniman.

Galatians 3

Yeesus Krais opora wiar opamkun Mua Maneka-ke mua kaken eliwa yia nainon

1 Ni Galesia faa, kema marew akena. Yo iiriw baliwep akena nia maakemkun Yeesus Krais nomokow moke-pa umok nain niena mokok onaiya urufowa saarik baliwep amisareman. Nain maa-ko ikiwosa nia momoreya o opora piipuowa naep oniman. 2 Aria yo aakisa ni opora fain-ko nia nokaremkun opora kiripomeka. Ni iiriw eena Ewar Eliwa niar orok nain niena Moses sira wiar ookiwkin niar orok-i, e Yeesus opor eliwa nain wiar miimap ookiwkin niar orok? Ni kema suuweka. 3 Ni moram naep naap momorariman, maa me kema suuwiman. Ni iiriw Ewar Eliwa-ke nia kekanoweya o ookowa onoma wuaman, nain aakisa kiremi yiena kekanowa-pa balisow ikaiyen naiman-yon. 4 Ni Yeesus teeria-pa ikok maa ele-eliwa urufomakeman, nain oram maneka urufaman-i e kamenap? Weetak, nain me oram urufaman-yon! 5 Mua Maneka-ke Ewar Eliwa nia sesekomami ona kekanowa-pa maa miililina imeneya ni niena mokoka-pa urufomakeman. Nain ni Moses sira ookiwkin naap nia onomiya, naap-i? Weetak, ni Yeesus opor eliwa wiar miimap wiar opiwkin naap nia onomiya.

6 Aria yiena nomokow fiira Abraham kema suuweka. O Mua Maneka opora wiar opeya Mua Maneka-ke no mua kaken eliwa naakek. 7 Aria, ni kema eenap aaweka, wi Yeesus opora wiar opimik nain Abraham upowa saarik, sira epaskun. 8 Ne Mua Maneka opora wiar siisimep-puiwkin ikua nain iiriw Mua Maneka-ke wi owow oko oko opora wiar opiwkin pina marew wia naek. Naep Abraham opora feenap maakep koonowak,

“Ikoka no muuta nain wi miiw unowa emeria mua unowa eliwa wia wuamkun kema eliwiw ikaikuan,”
(Yenesis 12.3)
opora naap maep-puak. 9 Abraham Mua Maneka opora wiar opap ookeya Mua Maneka-ke kema eliwa iwok. Ne sira naapiw, wi mua kaanin-ke Yeesus opora wiar opap ookimik nain pun kema eliwa wiinon.

10 Aria iiriw Mua Maneka opora siisimep-puiwkin ikua nain feenap maek,

“Moses sira wuomakek nain siisimemik. Ne wi mua kaanin-ke sira muutitik balisow akena me ookikuan-na wi ikoka Mua Maneka bagiaw wiar urufikuan.”
(Lo 27.26)
11 Ne Moses sira muutitik unowa ookowa nain iiwawun ookowa-ke me pepek. Iiriw opora naap maiwkin ikua nain Mua Maneka-ke feenap maek,

“Wi mua yo opora efar opap ookimik nain wi nain muutiw mua kaken eliwa wia nainen.”
(Habakuk 2.4)
Naapeya Mua Maneka-ke Moses sira unowa nain ookamkun i pina marew me yia nainon, weetak akena. 12 Ne iiriw Mua Maneka opor ara oko ikua nain pun feenap maek,

“Wi Moses sira wuomakek nain kuisow me piipuikuan, iiwawun maneka ookurumikuan-na eliw ikaikuan.”
(Wok Pris 18.5)
Naapeya Moses sira unowa ookowa-pa Mua Maneka me yia aawinon, Yeesus opor eliwa wiar opowa-pa makena, yia aawinon. 13 Feenap ikua, i Moses sira unowa nain baliwep wiar ookowa nain me pepek eramkun pina yiar imenarek. Naapeya Yeesus Krais i pina nain os-ke epak inep nomokow moke-pa umok. Nain moram iiriw Mua Maneka opor ara oko feenap maek,

“Mua eena nomokow iinan-pa sererimimik nain Mua Maneka-ke pina aawe naemi umowa suuwak.”
(Lo 21.23)
14 Mua Maneka ona iiriw Abraham opora maakep koonowak nain Yeesus muuta nain wi owow oko oko mua pun opora wiar opimik nain makena wia opominen naep wia aawok. Naeya Mua Maneka Ewar Eliwa sesekeya i yiar orowa maek nain i unowiya Yeesus opora wiar opamkun-na opora nain makena yia opominon.

Moses sira nain era wia ofakowam-ikaeya Krais imenarek

15 Aria emar unowik, yo aakisa owow sira maemi opor oposia maiyem. Feenap, mua oko opora maep koonowap-puak nain mua oko-ke opora me wiar puukikuan, weetak akena. Ne opor ara oko pun me wiar mikowawikuan, nain pun weetak akena. Sira nain kekanowa. 16 Ne sira naapiw iiriw Mua Maneka-ke Abraham ona nembesir teeria onaiya wia naep opora maakep koonowak. Nain nembesir unowa me wia kema suuwap maek, weetak. Abraham nembesir wiar maek nain nembesir kuisow muuta nain wiar kema suuwap maek, Krais maek. 17 Nain yo opora fain maekam naep maem, iiriw Mua Maneka Abraham opora maakep koonowak. Ne mokoma andet erepam ne ten arow naap weesereya Mua Maneka Moses maakeya sira unowa nain wuomakek. Nain Moses sira-ke Mua Maneka Abraham opora maakep koonowak nain me wiar weeser-wuinon ne me wiar puukinon, weetak. Naap ikainon. 18 Moram Mua Maneka Abraham opora maakep koonowak nain i Moses sira wiar ookamkun opora yia opominon, naap maiyen-na Mua Maneka ona opora eena iiriw Abraham maakep koonowak nain maa oram saarik ikainon. Nain makena wiar urufowa nain Mua Maneka ona yia kemalep Abraham opora maakep koonowak nain aakisa opora yia opomak.

19 Naap nain Moses sira wuomakek nain onoma kaanin Mua Maneka-ke maakeya wuak? Nain onoma feenap, wi mua sira samora onimik wia kema suuwap sira wuak. Ne sira nain naap ookam-ikaiwkin Abraham nembesir kuisow eena sesekowa maek nain wiar imenarek. Iiriw Mua Maneka eena Abraham opora maakep koonowak nain nembesir maek nain. Aria iiriw Mua Maneka Moses maakeya sira wuak nain wi ensel wieya koonowawu naep gone mua nain wapena-pa wiar wuiwkin os-ke i nembesir sira nain wiek. 20 Gone mua-na wi teeria erup gone-pa wiar ikok opora wiar mikowawomiya. Ne Mua Maneka iiriw Abraham opora maakep koonowak nain gone mua me iwok. Ona kakeniw maakek.

21 Feenap maiyen-i? Moses sira wuomakek nain-ke Mua Maneka Abraham opora maakep koonowak nain ipiskami epa wiar aawok, naap-i? Naap-ko me ikua. Moram Moses sira wuomakek nain ookami Mua Maneka wameiya eliw ikekamik-na sira nain ookamkun Mua Maneka i pina marew yia naekak, naeya eliw ikekamik. 22 Ne Mua Maneka opor ara oko ikua nain feenap, miiw unowa mua iiwawun sira samora-ke yia wasiep ikua. Ne Mua Maneka Abraham opora maakep koonowak nain wi Yeesus Krais opora wiar opimik nain muutiw opora wia opominon.

23 Aria, iiriw Yeesus Krais miiwa me orowa ikaeya Moses sira wuomakek nain-ke yia wasiep ikua. I naap ikok aakisa fan Yeesus Krais opora wiar opamkun iiwawun yia wasirkak. 24 Naapeya Moses sira nain-ke i yomar eliwa saarik yia urufam-ikok era yia ofakowam-ikaeya Krais orok. Ne i aakisa ona opora wiar opamkun Mua Maneka i pina marew yia naek. 25 Ne aakisa fan Yeesus Krais opora wiar opimik nain i Moses sira tepak-pa me ikemik, weetak. 26 Ne ni unow onaiya opora wiar opiman nain Mua Maneka muuka wiar areman. 27 Moram ni unow onaiya iiriw opora wiar opiwkin eka-pa nia yasuwamik nain Krais ona sira wiar aaweman. 28 Naapeya feenap maowa-ke weetak, “Yo Yuuda-ke, no Grik-ke, no purer mua-ke, yo yena miiwa-pa ikem, yo mua-ke ne no emeria-ke,” naap me yiam fo-fookikua. Moram i unow onaiya Krais kemena-pa kuisow arep ikemik. 29 Ne ni Krais teeria wiar arep nis pun Abraham nembesir teeria wiar areman. Ne naapeya Mua Maneka iiriw opora eena Abraham maakep koonowak nain opora nia opomak.